Homiladorlikning dastlabki belgilari
Homiladorlikning ilk belgilari har bir ayolda turlicha namoyon bo‘lishi mumkin. Ayrim ayollar homiladorlikning dastlabki haftalaridayoq organizmdagi o‘zgarishlarni sezadi, boshqalarda esa aniq belgilar bir necha haftadan keyin paydo bo‘ladi.
Homiladorlikning keng tarqalgan dastlabki belgilari:
• hayz ko‘rishning kechikishi;
• ko‘ngil aynishi yoki qayt qilish;
• ko‘krak bezlarining og‘rishi va sezgirligi;
• tez charchash va uyquchanlik;
• tez-tez siyishga chiqish;
• hid va ta’mlarga sezgirlikning ortishi;
• ishtahaning o‘zgarishi;
• kayfiyatning tez-tez o‘zgarishi;
• qorinning pastki qismida yengil tortishish;
• qindan oz miqdorda qonli ajralma kelishi.
Ushbu belgilar har doim ham homiladorlik mavjudligini anglatmaydi. Ular hayz siklining buzilishi, stress, gormonal o‘zgarishlar yoki boshqa kasalliklarda ham kuzatilishi mumkin.
Homiladorlikni qanday aniqlash mumkin?
Hayz ko‘rish kechikkanidan keyin uy sharoitida homiladorlik testini o‘tkazish mumkin. Test musbat natija ko‘rsatsa, akusher-ginekologga murojaat qilish tavsiya etiladi. Shifokor zarur hollarda qonda XGCh tahlili va ultratovush tekshiruvini tavsiya qiladi.
Homiladorlik tasdiqlangach, shifokor tavsiyasisiz dori vositalarini qabul qilmaslik, spirtli ichimlik va tamaki mahsulotlaridan voz kechish hamda ayollar konsultatsiyasida ro‘yxatdan o‘tish muhim.
Qachon zudlik bilan shifokorga murojaat qilish kerak?
Qindan ko‘p miqdorda qon ketishi, qorinning pastki qismida kuchli yoki bir tomonlama og‘riq, hushdan ketish, kuchli bosh aylanishi yoki yelka sohasida og‘riq kuzatilsa, shoshilinch tibbiy yordamga murojaat qilish kerak.
Maqoladagi ma’lumotlar umumiy tavsiyalar hisoblanadi va shifokor konsultatsiyasining o‘rnini bosmaydi.